1991 жылы бастау алған бұл бастама 34 жыл бойы әлем ұйымдарын біріктіріп, әйелдер мен қыздарға қарсы зорлық-зомбылықпен күрестің үздіксіз және батыл қадамдарды қажет ететінін еске салып келеді.
26 қарашада Жаяу Мұса атындағы Ақсу жоғары көпсалалы колледжінде «Біз цифрлық зорлық-зомбылыққа қарсымыз» флешмобы өтті. Алғашқы курс студенттері зорлық-зомбылыққа қарсы күрестің символы – қызғылт сары түспен плакаттар жасап, агрессияны тоқтатуға шақырған жарқын ұрандарын бейнеледі.
Артынша басталған шеру колледж дәліздерін ерекше үнмен толтырды. Плакат ұстаған қыздардың көзқарасынан бұл мәселенің алыстағы әңгіме емес, миллиондаған тағдырға тиетін шынайы ауыртпалық екенін сезінуге болатын.
Плакаттар «Әлем – зорлыққа қарсы!», «Стоп цифрлық агрессия!», «Біз қауіпсіздікті, құрметті, еркіндікті таңдаймыз!» деген үндеулермен жарқырады.
Бұл қысқа ғана шеру бейжай жанның жоқ екенін көрсетті. Жастар – үнсіз қалмайтын, қолдау көрсетуге және өзгеріс жасауға дайын буын екенінің дәлелі болды.
Кішкентай қадам болса да, оның күші зор. Дәл осындай қадамдар әлемді мейірімдірек әрі қауіпсіз етуге жол ашады.