Мемлекет басшысы Қасым-Жомарт Тоқаев өз Жолдауында:
«Жұмысшы мамандықтарына деген құрметті арттыра түсу – мемлекеттің алдында тұрған негізгі міндеттің бірі», – деп ерекше атап өтті.
Бұл сөздің маңызы айрықша. Қазіргі таңда Қазақстанға нақты экономика саласы үшін жоғары білікті мамандар қажет – инженерлер, құрылысшылар, техникалық бағыттағы кәсіби кадрлар. Дәл осындай мамандарды Жаяу Мұса атындағы Ақсу жоғары көпсалалы колледжі даярлайды. Студенттер тек теориялық білім алып қана қоймай, өңір мен елдің жетекші өнеркәсіп кәсіпорындарында өндірістік тәжірибеден өтіп, құнды тәжірибелік машықтарға ие болады.
Колледж ұжымы Президенттің ұстанымын толық қолдай отырып, жұмысшы мамандықтарының мәртебесін көтеру, олардың сұранысқа ие әрі лайықты жалақымен қамтамасыз етілуі үшін барлық жағдай жасалуы қажет деген пікірді толықтай бөліседі.
Білім беру сапасын арттыру, жұмыс берушілермен өзара байланысты нығайту және тәжірибелік базаны кеңейту арқылы колледж алға қойылған стратегиялық міндеттердің жүзеге асуына елеулі үлес қосады.
Айта кету керек, бұл бастама Жолдаудың негізгі бағыттарымен сабақтас: мектептерде цифрлық құзыреттер мен жасанды интеллект негіздерін қалыптастыру, азық-түлік қауіпсіздігін нығайту, энергетиканы жаңғырту және экономиканы цифрлық трансформациялау.
Колледждің педагогикалық құрамы еліміздің игілігі үшін белсенді еңбек ете отырып, мықты және бәсекеге қабілетті Қазақстанды құру жолындағы Президенттің бағытын табанды түрде қолдайды.
Жаяу Мұса атындағы Ақсу жоғары көпсалалы колледжінің басшысы
Қайрат Теміржанұлы Смағұлов