29–30 қазан күндері колледжде жаңа оқу жылында қабылданған студенттердің бейімделу үдерісін талқылауға арналған педагогикалық консилиум өтті.
Іс-шара барысында бөлім меңгерушілері, кураторлар мен оқытушылар бірінші курс студенттерінің оқу мен тәрбие үдерісіне бейімделу деңгейін саралап, кездесетін қиындықтарды атап өтті. Үлгерімі төмен студенттермен жұмысты жетілдіру жөнінде ұсыныстар жасалды.
Психологиялық қызмет әлеуметтік-психологиялық бейімделу бойынша сауалнама және тренингтер ұйымдастырды. Нәтижелер студенттердің оқу мен колледж өміріне белсенді араласып, жаңа ортаға сәтті бейімделіп келе жатқанын көрсетті.
Педагог-психолог Жунусова Л.Б. атап өткендей, кейбір ата-аналардың психологиялық сүйемелдеуге келісім бермеуі әлі де өзекті мәселе болып отыр. Бұл жағдай студенттермен түзету және дамыту жұмыстарын толық көлемде жүргізуге кедергі келтіреді.