«Қамқорлық» айлығы аясында Жаяу Мұса атындағы Ақсу жоғары көпсалалы колледжінің «ЖҮРЕК» еріктілер клубының жастары Қарттар мен мүгедектер үйіндегі тұрғындарға мейірім мен қамқорлыққа толы ерекше мереке сыйлады.
Еріктілер көптен күткен сыйлықтарын табыстаған сәтте әжелердің көзінен қуаныш жасы көрінді.
86 жастағы Тамара Ивановна Зыкова жаңа мүгедектер арбасына ие болса, 74 жастағы Людмила Викторовна Рагозинаға биотуалет табысталды.
Сонымен қатар, қарттар мен мүгедектерге арналған қарттар үйіне қамқорлықтағылардың өмірін жеңілдету үшін таяқ, ұстағыш таяқ, төсек жарасына қарсы құралдар және басқа да қажетті заттар берілді.
Бұл заттардың барлығы «ЖҮРЕК» еріктілер клубының мүшесі, студент Сәтпек Дильназ және оның отбасының қолдауымен алынды.
Бұл кездесудің сәттері еріктілер мен қариялардың жүрегіне жылулық сыйлады. Себебі шынайы алғыс сөздері, жылы күлкі мен қуаныш көз жасы – мейірімді жүректің ең үлкен сыйы.
Осындай игі істер әлемді нұр мен адамгершілікке толтырады. Үлкендерге қамқорлық пен жылулық сыйлаған Сәтпек Дильназдың отбасына және «ЖҮРЕК» еріктілер клубының жастарына алғыс білдіреміз. Осындай мейірімді жүректердің үлгісі басқаларды да жақсылық жасауға шабыттандырсын!
«Қамқорлық» айлығы: волонтёрлер қарттарға мейірім мен жылулық сыйлады (ВИДЕО)
