Қазақтың ұлттық тағамдары әлемдік асхана тарихында ерекше орын алады. Бауырсақ дастарханның ажырамас атрибуты болып саналады.
Жаяу Мұса атындағы Ақсу жоғары көпсалалы колледжінің студенттері «Бауырсақ-fest» іс-шарасында бауырсақтың жасалу ерекшеліктері, құрамы мен пайдалы қасиеттері, түрлерімен танысты. Бұл мереке бүгін білім ордамызда алғаш рет өтті.
Фестиваль колледж басшысы Алма Ермекқызы Айтуарова мен шара қонағы Рымкеш Хамитқызы Сламбекованың құттықтау сөзімен басталды.
Колледждің бірінші қабатын бауырсақтың иісі аңқыды. Әр дастарханда түрлі рецепт бойынша дайындалған үшбұрышты, төртбұрышты, сопақша, шар тәрізді, гауһар тәрізді, үлкенді-кішілі түрлі пішіндегі жайнаған алтын бауырсақтар болды.
Осы сұлулықтың бәрін сөзбен жеткізу мүмкін емес, оны көру керек.
Фестиваль бағдарламасы қызу өтті. Сергіту сәті, қайырымдылық жәрмеңкесі, «Үздік дастархан» байқауы және шеберлік сыныбы өтті. Жігіттер бауырсақ жеу сайысын тамашаласа, қыздар «Ұлттық тағам» бауырсаққа қамыр дайындау шеберлік сабағын тамашалады. Сабақты Ақсу қаласының құрметті азаматы Сламбекова Рымкеш Хамитқызы жүргізді.
Алдымен классикалық бауырсақтың рецептімен бөлісті, содан кейін практикалық бөлімге көшті.
«Бауырсақ – қазақ халқының мерекелік және күнделікті наны, ал нан – аса сақтықпен қарау керек ең қасиетті тағам. Бауырсақты дәмді ету үшін барлық ингредиенттердің тепе-теңдігін сақтап қана қоймай, ықыласпен және тамаша көңіл-күймен пісіру маңызды», – деп кеңес берді Рымкеш Хамитқызы.
Осы кезде колледждің мәдениет үйінде «Үздік дастархан» байқауы аяқталды.
Оның қорытындысы бойынша Е-123к тобы бірінші, мәдениет бөлімі екінші, ТЭУ-123 тобы үшінші орынға ие болды.
Ал қайырымдылық жәрмеңкесінің көмегімен студенттер 33 950 теңге жинады.
Колледждің студенттік парламенті бұл ақшаны «Қамқорлық» акциясына жұмсауды жоспарлап отыр.
Аспаздық дәстүрлерді сақтау және қазақтың ұлттық тағамдарын насихаттау мақсатында ұлттық қонақжайлылықты, береке мен ізгілікті бейнелейтін көңілді мереке өтті.